wonder of nature...

पर्यटनासह विविध क्षेत्रांत परस्पर सहकार्याची महाराष्ट्र व स्लोव्हानियाला मोठी संधी

मुंबई, दि. 13 जून : भारत विशेषत: महाराष्ट्र आणि स्लोव्हेनिया यांना पायाभूत सुविधा, रस्ते-विकास आणि पर्यटन या क्षेत्रांमध्ये परस्पर सहकार्य वृध्दीस मोठी संधी असल्याचे मत राज्याचे सार्वजनिक बांधकाम व पर्यटन मंत्री छगन भुजबळ यांनी आज येथे सांगितले. युरोपीय समूह देशांतील 'प्रजासत्ताक स्लोव्हेनिया' या देशाच्या वित्त मंत्री श्रीमती दार्जा रॅडिक यांनी शिष्टमंडळासह श्री. भुजबळ यांची त्यांच्या 'रामटेक' निवासस्थानी आज सकाळी सदिच्छा भेट घेतली. त्यावेळी ते बोलत होते.
यावेळी स्लोव्हानियाच्या व्यापार मंत्री श्रीमती मोइका ऱ्होवॅटिक तसेच सेक्रेटरी श्रीमती मेत्का अर्बास तसेच महाराष्ट्राच्या सार्वजनिक बांधकाम विभागाचे सचिव (रस्ते) धनंजय धवड, महाराष्ट्र पर्यटन विकास महामंडळाचे व्यवस्थापकीय संचालक किरण कुरुंदकर आणि महाव्यवस्थापक विजय चव्हाण उपस्थित होते.
यावेळी श्रीमती रॅडिक यांनी भारत विशेषत: महाराष्ट्र आणि स्लोव्हानिया यांच्यामधील पर्यटन वाढविण्याच्या दृष्टीने आपण मुंबई भेटीवर आल्याचे भुजबळ यांना सांगितले. त्यावर श्री. भुजबळ यांनी श्रीमती रॅडिक यांना महाराष्ट्रातील पर्यटन संधींविषयी सविस्तर माहिती दिली. ते म्हणाले की, विदेशातील पर्यटकांनी आवर्जून भेट द्यावी, अशी कित्येक अद्वितीय पर्यटनस्थळे महाराष्ट्रात आहेत. सुंदर सागरी किनारे, ऐतिहासिक गड-किल्ले, गुंफा, लेणी, राजवाडे, लोणार सरोवर याबरोबरच प्रगत महाराष्ट्रात अनेक जागतिक दर्जाचे उद्योगही आहेत. औद्योगिक क्षेत्राबरोबरच पायाभूत सुविधा व रस्ते विकासाच्या क्षेत्रातही महाराष्ट्राने मोठी झेप घेतल्याचे भुजबळ यांनी निदर्शनास आणले.
श्रीमती रॅडिक यांनीही युरोपमध्ये भारतीय पर्यटक मोठया संख्येने येत असून त्यामध्ये महाराष्ट्रातील पर्यटकांची संख्या लक्षणीय असल्याचे सांगितले. केवळ दोन दशलक्ष लोकसंख्या असलेल्या स्लोव्हानियामध्ये अनेक उत्तम नैसर्गिक पर्यटनस्थळे असून भारतीय पर्यटकांनी स्लोव्हानियासही आवर्जून भेट द्यावी, असे आवाहन केले. मुंबई शहराच्या दर्शनानेही आपणास अत्यंत आनंद झाला असल्याची भावनाही त्यांनी बोलून दाखविली.

जे. डे यांच्या कुटुंबियांचे भुजबळ यांच्याकडून सांत्वन

मुंबई, दि. 12 जून : राज्याचे सार्वजनिक बांधकाम व पर्यटन मंत्री छगन भुजबळ यांनी आज सकाळी ज्येष्ठ पत्रकार जे. डे यांच्या घाटकोपर येथील निवासस्थानी त्यांच्या पार्थिव देहाचे अंत्यदर्शन घेऊन श्रध्दांजली वाहिली आणि त्यांच्या कुटुंबियांचे सांत्वन केले.
आज सकाळी पावणेदहाच्या सुमारास जे. डे यांचा पार्थिव देह जे.जे. रुग्णालयातून त्यांच्या घाटकोपर येथील निवासस्थानी आणण्यात आला आणि तेथे अंत्यदर्शनासाठी ठेवण्यात आला. श्री. भुजबळ यांनी जे. डे यांच्या पार्थिवावर पुष्पहार अर्पण करून त्यांना अखेरचे अभिवादन केले.
'एखाद्या पत्रकारावर हल्ला झाला तरी, त्याची गांभिर्याने दखल घेण्यात येते. इथे तर डे यांची हत्या झालेली आहे. त्यामुळे राज्य शासन आणि पोलीस प्रशासन संबंधित माफियांविरोधात कठोर पावले उचलल्याखेरीज राहणार नाही,' असे भुजबळ यांनी यावेळी प्रसारमाध्यमांच्या प्रतिनिधींशी बोलताना स्पष्ट केले.

जे. डे यांच्या हत्येचे वृत्त धक्कादायक : छगन भुजबळ

मुंबई, दि. 11 जून : 'दैनिक मिड-डे'चे ज्येष्ठ क्राइम रिपोर्टर जे. डे यांच्या हत्येचे वृत्त समजून आपल्याला अत्यंत धक्का बसला आहे, अशा शब्दांत राज्याचे सार्वजनिक बांधकाम व पर्यटन मंत्री छगन भुजबळ यांनी या घटनेचा तीव्र शब्दांत निषेध व शोक व्यक्त केला आहे.
श्री. भुजबळ यांनी म्हटले आहे की, क्राइम रिपोर्टिंग आणि शोध पत्रकारितेच्या क्षेत्रात जे. डे यांनी गेली कित्येक वर्षे आपल्या नावाचा दबदबा निर्माण केला होता. पोलीस, खबरे तसेच पत्रकारितेच्या क्षेत्रातही एक अजातशत्रू व्यक्तिमत्त्व म्हणून ते परिचित होते. डे हे अत्यंत उमद्या व उत्साही स्वभावाचे पत्रकार होते. माझेही त्यांच्याशी अत्यंत स्नेहाचे संबंध होते. त्यांची अशा प्रकारे हत्या व्हावी, ही घटनाच क्लेशदायक आहे. त्यांच्या निधनामुळे पत्रकारितेच्या क्षेत्राची मोठी हानी झाली आहे, असे भुजबळ यांनी म्हटले आहे.
जे. डे यांनी मुंबईतील अंडरवर्ल्ड आणि खबऱ्यांचे जाळे या विषयावर        झगझगीत प्रकाश टाकणाऱ्या 'खल्लास' आणि 'झिरो डायल' या आपल्या पत्रकारितेतील अनुभवावर अत्यंत रोमहर्षक आणि थरारक कादंबऱ्या त्यांनी लिहील्या. गेल्या दोन दशकांत महाराष्ट्राच्या गुन्हेगारी जगताची अंडरवर्ल्डकडून दहशतवादाकडे झालेली वाटचाल रेखाटलेल्या 'झिरो डायल' या कादंबरीचे गेल्या ऑगस्ट 2010मध्ये माझ्या हस्ते 'क्रॉसवर्ड'मध्ये प्रकाशन झाले होते, अशी आठवणही भुजबळ यांनी करून दिली.

रमेश वांजळे यांच्या निधनामुळे धडाडीचा लोकप्रतिनिधी हरपला- भुजबळ

मुंबई, दि. 11 जून : महाराष्ट्र नवनिर्माण सेनेचे खडकवासला येथील आमदार रमेश वांजळे यांच्या अकाली निधनामुळे एक धडाडीचा आणि लोकप्रिय लोकप्रतिनिधी काळाच्या पडद्याआड गेला आहे, अशा शब्दांत राज्याचे सार्वजनिक बांधकाम व पर्यटन मंत्री छगन भुजबळ यांनी आपल्या शोकभावना व्यक्त केल्या आहेत.
श्री. भुजबळ यांनी आपल्या शोकसंदेशात म्हटले आहे की, 'गोल्ड मॅन' म्हणून राज्यभरात प्रसिध्द झालेल्या आमदार रमेश वांजळे यांनी आपल्या धडाडीच्या कार्यपध्दतीमुळे मतदारसंघातील जनतेची मनेही जिंकली होती. महाराष्ट्र विधीमंडळातही त्यांनी आपल्या आक्रमक शैलीत काम करत चमक दाखविण्यास सुरवात केली होती. त्यांचे अकाली निधन मनाला चटका लावणारे आहे. त्यांच्या निधनामुळे त्यांच्या कुटुंबियांवर तसेच मतदारसंघातील जनतेवर दु:खाची कुऱ्हाड कोसळली आहे. त्या सर्वांच्या दु:खात मी सहभागी आहे. रमेश वांजळे यांच्या आत्म्यास सद्गती लाभो, अशी प्रार्थनाही श्री. भुजबळ यांनी केली आहे.

तारकर्ली, गणपतीपुळे ऑक्टोबरनंतरच गाळमुक्त होणे शक्य

तारकर्लीमधील संगम पॉईंट येथे मोठ्या प्रमाणात गाळ साचला आहे. त्यामुळे तेथे हायस्पीड बोटी चालविण्यात मोठा अडथळा येतो आहे. त्याचप्रमाणे गणपतीपुळे येथील खाडीमध्येही बराच गाळ साचलेला आहे. तो गाळ तातडीने काढण्याची आवश्यकता श्री. भुजबळ यांनी मेरिटाईम बोर्डाच्या अधिकाऱ्यांकडे व्यक्त केली. त्यावर मेरिटाईम बोर्डाच्या ताफ्यात येत्या ऑक्टोबरपर्यंत चार नवीन ड्रेझर दाखल होत असून त्यानंतरच हा परिसर गाळमुक्त करता येऊ शकेल, असे बोर्डाच्या अधिकाऱ्यांनी सांगितले.
            मुंबईला गेटवे ऑफ इंडियासमोर तरंगती जेटी तयार करण्याच्या प्रस्तावालाही लवकरच मंजुरी मिळण्याची शक्यता असल्याची माहितीही यावेळी बोर्डाच्या अधिकाऱ्यांनी श्री. भुजबळ यांना यावेळी दिली.
            याखेरीज सागरी महामार्गाचे काम गतीने पूर्ण होण्याच्या दृष्टीने मेरिटाईम बोर्डाशी संबंधित विषयही बोर्डाने तातडीने मार्गी लावावेत, अशी सूचनाही श्री. भुजबळ यांनी यावेळी केली.

एमटीडीसी कडून प्रशिक्षित व्यक्तींनाच यापुढे कोकणात स्नॉर्केलिंगचा परवाना

मुंबई, दि. 10 जून : मालवणसह कोकणात अन्यत्र सुरू असलेल्या बेकायदेशीर खाजगी स्नॉर्केलिंग व्यवस्थापनांना पायबंद घालण्यासाठी या परिसरात केवळ महाराष्ट्र पर्यटन विकास महामंडळामार्फत प्रशिक्षित करण्यात आलेल्या व्यक्तींनाच परवानगी द्यावी, त्याचप्रमाणे अशा व्यक्तींची शिफारस करण्याचा अधिकार (Recommending Authority) हा सुद्धा महाराष्ट्र पर्यटन विकास महामंडळाकडेच असायला हवा, असे राज्याचे पर्यटन मंत्री छगन भुजबळ यांनी काल येथे स्पष्ट केले. श्री. भुजबळ यांच्या या मागणीशी महाराष्ट्र मेरिटाईम बोर्डाच्या अधिकाऱ्यांनीही सहमती दर्शविली.
महाराष्ट्र मेरिटाईम बोर्ड यांच्याकडे महाराष्ट्र पर्यटन विकास महामंडळाच्या विविध प्रलंबित प्रस्तावांबाबत चर्चा करून तोडगा काढण्यासाठी काल श्री. भुजबळ यांच्या मंत्रालयातील दालनात बैठक झाली. त्यावेळी ते बोलत होते.
यावेळी महाराष्ट्र पर्यटन विकास महामंडळाचे व्यवस्थापकीय संचालक किरण कुरुंदकर, महाराष्ट्र मेरिटाईम बोर्डाचे मुख्य कार्यकारी अधिकारी एस.डी. शिंदे, सह-व्यवस्थापकीय संचालक अविनाश ढाकणे, पर्यटन विभागाचे उपसचिव राजीव निवतकर, महाव्यवस्थापक श्री. चव्हाण, मेरिटाईम बोर्डाचे कॅप्टन डी.बी. रोहिला, बंदर अधीक्षक प्रदीप बढीये तसेच मेरिटाईम बोर्डाचे उपअभियंता सुधीर देवरे आदी उपस्थित होते.
यावेळी श्री. भुजबळ म्हणाले की, कोकणात सुरू असलेल्या बेकायदेशीर स्नॉर्केलिंगमुळे पर्यटकांच्या जीवितास धोका पोहोचू शकतो. अशा प्रकारांमुळे उद्भवणारी कोणतीही अपघाताची शक्यता टाळण्यासाठी तसेच या सुविधेचा आंतरराष्ट्रीय दर्जाचा विकास साधण्यासाठी केवळ `एमटीडीसी`मार्फत प्रशिक्षण घेतलेल्या व्यक्तींनाच प्राधान्य दिले पाहिजे.
यावर सहमती दर्शवत मेरिटाईम बोर्डाच्या अधिकाऱ्यांनी अशा प्रकारच्या एकदम शंभर व्यक्तींसाठी परवानगी देण्याची तयारी दर्शविली. त्यांची निवड कशा प्रकारे करावी, किती टप्प्यात करावी, याबाबतचा निर्णय `एमटीडीसी`ने घ्यावा, असे सांगितले.
`एमटीडीसी`च्या स्कुबा डायव्हिंग संकुलातून व्यावसायिक पातळीवर स्कुबा डायव्हिंग अभ्यासक्रम तसेच वाणिज्यिक प्रचलनासाठीही परवानगी देण्याची तयारीही मेरिटाईम बोर्डाच्या अधिकाऱ्यांनी दर्शविली. त्यासंदर्भात सविस्तर चर्चा करण्याचे आश्वासनही त्यांनी दिले.
त्याचप्रमाणे हायस्पीड बोटींना प्रचलनासाठी दरवर्षी परवानगी घेत बसण्यापेक्षा `एमटीडीसी`च्या मागणीनुसार, किमान पाच वर्षांच्या कालावधीला परवानगी देण्याची बोर्डाची तयारी असून त्यासंदर्भात `एमटीडीसी`ने सविस्तर प्रस्ताव द्यावा, अशी सूचनाही बोर्डाच्या अधिकाऱ्यांनी केली. आरोंदा व तारकर्ली येथील हाऊसबोट चालविण्यासाठीही अशा प्रकारची परवानगी देता येऊ शकेल, असेही त्यांनी स्पष्ट केले.
यावेळी `एमटीडीसी`मार्फत घारापुरी लेणी (एलिफंटा) येथील उपलब्ध असलेल्या जेट्टीच्या दुरुस्तीबरोबरच गणपतीपुळे, गुहागर, मुरुड हर्णै, हरिहरेश्वर, तारकर्ली, देवबाग, मुरुड जंजिरा येथे जेट्टी उभारण्यासाठी परवानगी मागण्यात आली.
12व्या वित्त आयोगाअंतर्गत उपलब्ध निधीमधून मांडवा (जि. रायगड) येथे जेट्टीजवळ पर्यटक मार्गदर्शन केंद्रासाठी जागा उपलब्ध करण्याबरोबरच स्वच्छतागृहांच्या अद्ययावतीकरणाचीही मागणी यावेळी करण्यात आली. त्याचप्रमाणे मुंबई येथे गेट-वे ऑफ इंडिया ते घारापुरी, मांडवा हार्बर क्रूझ सेवेसाठी 5 वर्षाकरिता हायस्पीड बोट चालविण्यासाठी परवाना आणि जयगड ते तौसाळ अशी फेरी बोट सुरू करण्याची परवानगी देण्याची मागणी `एमटीडीसी`कडून मेरिटाईम बोर्डाकडे करण्यात आली.
किरणपाणी (ता. आरोंदा, जि. सिंधुदुर्ग) येथील मेरिटाईम बोर्डाच्या कार्यालयाची मोडकळीस आलेली इमारत पर्यटकांची तात्पुरती सोय करण्यासाठी `एमटीडीसी`कडे भाडेतत्त्वावर हस्तांतरित करण्याची मागणीही यावेळी करण्यात आली.

एम. एफ. हुसेन यांच्या निधनाने रंग गहिवरले: अजित पवार

मुंबई, ता. ९ - जागतिक कीर्तीचे चित्रकार एम. एफ. हुसेन यांच्या निधनाने चित्रकला सृष्टीचे रंग गहिवरले आहेत. अशा शब्दात उपमुख्यमंत्री अजित पवार यांनी आपल्या शोकभावना व्यक्त केल्या आहेत.
आपल्या शोकसंदेशात त्यांनी म्हटले आहे की, भारताचे पिकासो म्हणून ओळखल्या जाणार्‍या पद्मविभूषण एम. एफ. हुसेन यांनी स्वतःची चित्रकला शैली निर्माण केली होती. महाराष्ट्राच्या मातीत जन्मलेल्या या अवलिया चित्रकाराने भारतीय चित्रकलेला जगन्मान्यता मिळवून देण्यासाठी विशेष प्रयत्न केले. त्यांच्या निधनाने भारतीय चित्रकलेचा एक अध्याय अस्तंगत झाला आहे.

पर्यावरणमंत्री छगन भुजबळ यांनी बोलावलेली बैठक

एम.एफ. हुसेन यांच्या निधनामुळे आंतरराष्ट्रीय ख्यातीचा कलाकार हरपला

मुंबई, दि. 9 जून : सुप्रसिद्ध चित्रकार मकबूल फिदा हुसैन यांच्या निधनामुळे भारत आंतरराष्ट्रीय ख्यातीच्या कलाकाराला कायमचा मुकला आहे, अशा शब्दांत राज्याचे सार्वजनिक बांधकाम व पर्यटन मंत्री छगन भुजबळ यांनी आपल्या शोकभावना व्यक्त केल्या आहेत.
श्री. भुजबळ यांनी आपल्या शोकसंदेशात म्हटले आहे की, आपल्या सिद्धहस्त रंगरेखांच्या माध्यमातून या कलंदर कलाकाराने जगप्रसिद्ध कलाकृती निर्माण केल्या. त्यांच्या काही कलाकृती वादग्रस्त ठरल्या असल्या तरी भारताला विशेषतः महाराष्ट्राला कलेच्या जागतिक कॅनव्हासवर नेण्यासाठी त्यांनी दिलेले योगदान कधीही विसरता येणार नाही. स्वतःच्या वैशिष्ट्यपूर्ण कलाशैलीच्या माध्यमातून एम.एफ. हुसैन यांनी जागतिक कलाविश्वात स्वतःचे आगळेवेगळे स्थान निर्माण केले होते, असेही त्यांनी म्हटले आहे.